>> الجـــــــزء الثــــــــاني <<
يوم الخميـــس بعد صلاة العشاء (( في بيت بو حمد )) /
تجمعوا كل العايله ينتظروا العشاء كالعاده ..
بو حمد / اجل مشى سطام مع فهد وفيصل دبي ..؟
حمد / ايه يبــه مشوا من امس الصباح ..
بو حمد / طيب وشغل فيصل وفهد ..؟ على الأقل سطام مدرس وهذه اجازته غاب يوم واحد بس مو مثلهم فيصل بالهاتف .. وفهد مدير شرطه ..!!
مشاري / اكيد يبه خذوا اجازه ..
ام حمد / ايه انا سمعت من ام متعب انهم ماخذين اجازه ..لمدة ثلاث ايام ..
ضي / على الأقل خذوا جو شوي مو مثلنا نفكر بالأختبارات ..
ام حمد / صلي على النبي ..
ضي / عليه الصلاة والسلام .. عيني مو حاره يمه ..
الكل / هههههههههههه
بيان نزلت من الدرج وطلت عليهم وهي مبتسمه من ديكور الصاله الي على شكل قوس / دوووم الضحكه يااارب بس كان انتظرتوني علشان تضحكوني معكم ..
بو حمد يرفع راسه يناظر بنته تناظر فيه / هههههههه هلا بـ حبيبة ابوها تعالي يمه لو ادري انك بتتكرمين اليوم وتتعشين معنى انتظرنا ماتكلمنا ..
ضي كشرت / اللـــــــــــــــــه لنا جات الأميره ..
بيان جات تركض ومثل الطفل طاحت بحضن ابوها ..
مشاري / بل بل بل بشوي شوي يابنت لاتذبحين ابوي ..
ام حمد / من ثقلها معصقله الاختبارات خلت فيها شيء ..
حمد / هههههههههههههههههههههههههههههههههههههههه معصقله هههههههههههههه وربي تجنن هالكلمه ..
التفتو عليه مستغربين من ضحكه وهو يمسح دموعه ..
بيان بدلع تناظر ابوها وهي مازالت جالسه بحضنه / يبــه ليكون حمد اخوي انهبل ..
بو حمد يبتسم / شكله ياروحي ..
ام حمد / خلاص نزلي من عند ابوك بيان .. ولاتدلعها زياده ياروحي وياحبي ماهي ناقصه دلع البيت كله مدلعها ..
مشاري / الوالده غيرانه ههههههههههههههههه
ضي / لا وربي صادقه الكل يدلعها (( وخزت بيان ))
بيان نزلت من حضن ابوها وجلست جنبه وحطت طرف صبعها بفمها كالعاده كنها بريئه / الحين ليه تخزيني وش ذنبي اني آخر العنقود ..؟
بو حمد / صدق وش ذنبها انها آخر العنقود .. ووش ذنبها انها طلعت تشبه امي ..؟
الكل / اوووووووووووووووووووووووووووووو
حمد / والله وجاء يوم تعترف انك تفضلها لسببين وليس لسبب واحد ههههههههه
ضي / الله على العربيه هههههههه
ام حمد / اساسا من اول ماجبتها وشافها تشبه الوالده الله يخليها على طول صار مدلعها ماتصيح الا هو بوجهها ..
مشاري / ايوا والله مااذكر طلبت شيء مالقته عندها اليوم الثاني .. اذا بغيت شيء انا اقول لها خخخخخ
بو حمد / لا ليه ..؟ حتى انت واخوانك قصرت معكم ..؟
مشاري قام وحب راس ابوه / لا والله الشاهد عمرك ماقصرت معنا بـ شيء لو طلبنا عيونك
الكل / اووووووووووووووووووو
بو حمد / متعلمين هالكلمه اشوفكم هههههههه ..
بيان / هههههههههه الا اقول يبـــه ..
بو حمد طالعها بحنية الدنيا كلها / سمي يمه ..
تغامزوا الي جالسين ولااهتمت منهم بيان ابتسمت / لاتنسى ابوي الخميس الجاي تجيب جدتي من بيت عمي محمد جلست عندهم شهر بالضبط والحين دورنا ..
بو حمد / هههههههههههه حاسبتهم بيان ..؟
ام حمد / لو تشوف الجدول الي عندها بالغرفه كل يوم يمر تأشر عليه علشان تعرف متى يجي دورنا بالضبط ههههههه
حمد / والله والضحيه جدتي كل شهر في بيت واحد ..
مشاري / ليه عادي ..؟ في بيتنا وبيت عمي محمد وعمي ضاري عندها غرفه خاصه وملابس مختلفين .. يعني كل الي عليها تلبس عباتها وتجي وملابسها موجوده في كل بيت ..
ضي / صادق مشاري .. وبعدين كل العايله متعلقين فيها وش الحل يعني ..؟ تجلس بيت عمي محمد لأنه كبير .. وانت تعرف ان ابوي وعمي ضاااري يموتون فيها ..
بو حمد / ايوا والله من يوم توفى ابوي قبل خمس سنوات .. وهي كل شهر ببيت احد علشان ترضي الجميع ..
ام حمد / بس انت تعرف انها تحبك انت اكثر لانك آخر العنقود ..
مشاري وهو يصفر / اكشششششششخ ابوي من قدك ..
بو حمد / هههههههههه تصدق مشاري الدنيا دواره .. امي حبتني لأني اشبه ابوها جدي الله يرحمه .. وحبتني لأني آخر العنقود بعد ماجابت عمك محمد وضاري وعمتك شجون الله يرحمها ماتت وعمرها 5 سنوات ..
الجميع / الله يرحمها ..
بو حمد يكمل وكنه يرجع للماضي ويعيشه بهـاللحظات / مع انها حبت الكل الا اني مميز بالنسبه لها وبالنسبه لجدي الله يرحمه .. ويوم كبرنا حبيناها كلنا بس انا كنت احن عليها وهي مايله لي اكثر .. وصارت آخر العنقود لي بيان تشبه امي كثير .. ومع اني احبكم كلكم وانتوا تعرفون (( وابتسم لهم )) ..
ابتسموا له يشجعونه انه يكمل وكأنهم يقولون عارفين يا الوالد ..
بو حمد / بس بيان كعادة اي اهل .. ملت لها انا وامي اكثر شوي لأنها آخر العنقود وفي نفس الوقت لانها تشبه الوالده .. وكأن الدنيا دارت وقالت أكرر القصه مرتين ههههههههه
الكل / هههههههههههه
بيان بثـــقه تناظر اخوانها / واكيد مثل ماابوي يحب جدتي اكثر انا بحب ابوي اكثر (( وطلعت لسانها لأخوانها )) ..
الكل مسك مخده ورموها عليها بنفس الوقت وهي اختبت ورا ابوها .. وبو حمد ميت من الضحك ..
بو حمد / لاتغارون احبكم كلكم مثل بعض .. بس تعرفون لوموا امكم لأنها ماجابتكم آخر شيء ههههههههه
ام حمد / بعد وش ذنبي انا ههههههههه
الكل / اووووووووووو
بيان / رجعنا على كلمتنا هههههههههه
حمد / المفروض يبه قلت لنا هالكلام وبيان مش موجوده .. الحين وش يفكنا من دلعها ..
ضي بحماس / والللللللللللللللللله انك صاااااااااااادق مليوووووووون مره الحين كل دقيقه بتقول لنا هالقصه ..
بيان مدت بوزها شبر / وش قصدكم انا مغروره ..؟
مشاري / حشــــــــــــــى ماقلنا كذا ..
الكل / ههههههههههه
ام حمد / يالله بقوم اخليهم يحطون العشاء سوالفكم ماتخلص الله يخليكم ..
مشاري يناظر فيها بخبث ويرفع حاجب / اقول يمه وش ذا الكشخه اليوم ..؟ محلوووووووووووووووه
ام حمد تعرف حركات ولدها / وش محلوه ..؟ هذا انا مثل كل يوم ..
حمد / لا وربي محلوه اليوم صدق وش صاير ..
فتحت ام حمد عيونها مو عادة حمد يقول كذا / ليكون عاداك اخوك ..
الكل / هههههههههههه
ضي / اليوووم ضحكنا ضحك الله يستر ..
بيان / لاتفااولين ..
بو حمد وعيونه مازالت على ام حمد / اقول ..
الكل / قول ..
بو حمد / صدق محلوه اليوم ام حمد ..
حمرت ام حمد ..
حمد / هههههههههه شوفوا اقول من طالعه عليه بيان خدودها كله محمره .. ناظروا خدود الوالده ..
ضربت ام حمد .. حمد على كتفه بشوي شوي وهو يضحك ..
بيان / اساسا امي توها صغيره يوم تجيبك كان عمرها 13 سنه صح امي ..؟
ام حمد تبتسم وكانت فعلا الي يشوفها يقول بكرها ضي توها صغيره / لا يوم اتزوج عمري 13 وجبت حمد عمري 14سنـه ..
بو حمد / ايوا اذكر كنت اذا ابي اراضيها اجيب لها حلاوه ومصاصه ..
هنا الكل ماستحمل وجلسوا يضحكون وعيونهم تدمع ..
ام حمد قامت وكنها معصبه وهي فيها الضحكة بس ماسكتها / اقول اروح اساعدهم وهم يحطون العشاء احسن ..
هالمره بو حمد قال مع عياله / اووووووووووووووووووووووو
\
في فنـــدق في دبي الساعه 9 المساء /
سطام وهو ينسدح على السرير بقوته / آآآآآآآآآآآه جســــــمي احسه تكسر من هالمشي .. ياليتني ماطعتكم وجيت معكم بيتنا ابرك لي ..
فيصل / صدق يوم قاال فهد شــــــــــــــــايب بكل معنى الكلمه ..
فهد / علشان تعرف اني مااتكلم الا بعد ما أتأكد من الكلام الي اقوله ..
سطام وهو منسدح يناظر السقف / تكـــــــــــــــفى ما أقدر انا ..
فيصل انسدح بالسرير الي جنب سطام / آآه تصدق حتى انا تعباان ..؟
سطام / شيء طبيعي اساسا من الصبح وحنا بهالأسواق والمتنزهات ..
فيصل / ياحلـــــــو البحر بس ..
فهد / اقول يالشياب انا بطلع اتمشى تحت عند الفندق تبون شيء ..؟
فيصل وسطام رفعوا راسهم مع بعضهم وفتحوا عيونهم ..
فيصل / من صدقك ..؟
سطام / لاااااااا مانــت صاحي ..!!
فهد / وش في الشياب مستغربين ..؟ عطوني جوالاتكم بس ..
فيصل / وش تبي فيهم ..؟
فهد / برقص معهم .. تعرفني احب ارقص ..... بشووف الرسايل اتسلى فيهم بدال ماأناظر الرايح والجاي ..
سطام / تعرف وش امنيتي فهد ..؟
فهد من غير اهتمام / وش هي ..؟
سطام بأبتسامه / انـــــــك تبتسم من قلبـــــــك ..
وقبل مايرد فهد كمل سطام / بس مو بأستهزاء كالعاده ..
فيصل / هههههههههه هالأمنيه صعب تحقيقها ..
فهد / فيــــــــــصل ..!!
فيصل / طيب سكتنا يا أخوي الكبير (( وسوا حركه بفمه انه سكره ))
فهد / وش هالأمنيه الغريبه سطام ..؟
سطام / ماادري احسك يااخي حتى لو مزحت مو من قلبك ..
فهد / والله وش اسوي اسلوبي .... ويالله عطوني جوالاتكم ياشطار ..
فيصل التفت لسطام / شوف الأخ فهد يحسبنا بزارين يلعب علينا مايدري اننا اصغر منه بثلاث سنوات بس ..
سطام / ههههههههههههههه
فهد راح يمشي / بتذلوني مع وجهكم يالله مع السلامه ..
سطام / لحظه لحظه خذ جوالي (( طلعه من جيبه )) بس ها .. الأرقام امانه لاتقربهم ..
خزه فهد / يعني برضى على بنات عمي ..
فيصل بصوت واطي / ماينضمنون المغازليه ..
سطام / ههههههههه (( التفت على فهد )) مو قصدي بس يعني اعرفك فضوولي ..
خذ فهد من سطام الجوال / لا لاتخاف بس بشوف الرساايل والصور مثل ماقلت فضولي بهالأشياء مع انها حقت مراهقين بس وش نسوي نونس نفسنا على مايرتاحون الشياب ..
سطام + فيصل / هههههههههههههههههههههههه
\
نزل فهد تحت وخذ له كابتشينو وجلس يتمشى .. طلع جوال فيصل وراح الاستديو شاف الصور .. بعدين انتقل للرسايل ..
اول ثلاث رسايل كانت من مشاري .. والخمس الي بعدها من ربعه الشباب .. وبعدها من وحده اسمها (( ربي يخليها )) ..
فكر فهد معقوله من امه ..؟ لا يمكن من اخته بس اي اخت .. نزل تحت وبعد كم رساله شاف تقريبا عشر رسايل ورى بعض من (( قلـب اخوها )) هذه تأكد انها من اخته .. بس عارف ان عنده ثلاث خوات .. يتمنى يعرف اي وحده فيهم بيان ..!!
وليه ..؟ وش ابي في بيان انا اقرا رسايلها ..؟ فتح الرساايل وقام يقرا وحده وحده ..
انتقل للرسائل المرسله .. ولاشعوريا راح لـ رساله مرسوله لـ حبيبة أخوها .. فتحها ..
(( ضي قولي لأمي تجهز الاغراض الي بوديهم بيت خالي ))
ابتسم فهد وكأنه حال لغز .. نزل تحت وشاف رسايل كثيره مرسوله لـ قلـــب اخوها .. يمكن بيان ..؟ فتحها وشاف من ضمنها ..
(( بيـــان ليه ماتردي ..؟ اذا مو نايمه تعالي تحت بسرعه وبتشوفي مفاجئــه ))
هالمره يوم قرا اسم بيان ابتســـم ابتســامه من قلبه .. مثل ماتمنى سطام .. ياااربي وش فيني وش سالفة هالبنت ..؟
من قبل ثلاث سنوات وانا فيني شيء .. ماراح انسى ذاك اليوم .. يوم كانت بيان في ثالث متوسط .. وكنت عندهم بالبيت انتظر حمد ..
بيان وهي تنزل بسرعه / ميشووووووو ميشووووو
ناظرت فهد الي جالس يناظر فيها بأستغراب لأنه له ثمان سنوات ماشافها ..
بيان حمرت خدودها بسرعه ورجعت على ورى بس كان وراها مشاري / نعم حبيبتي وش فيك ..
ناظرته وجات بتروح مسكها مشاري / وش فيك ..؟
بيان تناظر فهد / مممم كنت ابي اقولك ...... اني ابي اروح ..... ممممم
مشاري يناظر في فهد الي عيونه على بيان / وش قايل لها خايفه كنها شايفه جني ..
فهد ابتسم ابتسامه خفيفه جدا / لا بس شكلها مستحيه لأنها ماعرفتني مو عادتي اجي بيتكم ..
مشاري / الله تبي تقولي على كثر ماجات بيتكم ماشافتك ..؟
بيان مسكت ثوب مشاري وبصوت خافت قالت / مشاري .. وقت اسئله بروح فوق وبقولك الي ابي بعدين ..
راحت بيان بسرعه تركض فوق ..
مشاري / والله اعتفس وجه البنت الي يشوفها عروس بليلة عرسها ههههههه
حمد طلع من المجلس / هذا طبع بيان ..
مشاري / بسم الله من وين طلعت جالس تتجسس ..؟
حمد وهي يدف اخوه علشان يسلم على فهد / طلعت من الباب وسمعتكم بالصدفه عندك مانع ..
سلم على فهد ..
مشاري / تدري اني مستغرب ان بيان ماتعرف فهد .. وفهد مايعرف بيان ..؟
فهد يخزه / وش دعوه مااعرفها اذكرها وهي بأول ابتدائي .. كانت خالتي تدرسها الحروف ..
حمد / هههههههههههههههههههههههههه الله قديم وربي انت مغبر الحين بثالث متوسط .. وينك عن بيتكم ماتجيه ..؟ بيان عند ساره اختك دايم ..
فهد / صدق دايم عندها بس ماتطلع من الغرفه واذا طلعت اشوفها بعباه وغطوه وبرقع من هي صغيره ماادري شـالسالفه ..؟
حمد + مشاري / ههههههههههههههههههههههههههه
مشاري / هذا طبعها متغطيه من يوم عمرها 13 سنه يقالها بس تبي زوجها يشوفها ..
حمد / اختي رومانسيه من هي صغيره هههههههه ..
\
رجع فهد للواقع بعد ماسمع بوووري سيااره مزعج ..
سكر جوال سطام .. الله على ذاك اليوم حسيت اني شفت احلى عيون بالكون .. عيووون دائريه لامعه .. لونها عسلي على بني ..
ماادري وش فيني صرت بس افكر فيها .. رجع للفندق علشان يرجع جوال سطام وبنفس الوقت يرتااح لانه توه حاس بالتعب ..
والله وطلـــــــعت انا الشايــــــــــــــب ..!!
\
في بيت (( بو ثامر )) الساعه 3 الفجر /
كانت تهاني جالسه على الماسنجر تكلم ضي .. لما سمعت ضرب خفيف على باب غرفتها ..
تهاني / ادخــــل ..
دخلت غلا مكشره وماده بوزها .. سكرت الباب وراها وجلست على السرير بدون اي كلمه ..
تهاني لفت على الكرسي الدوار وناظرت غلا ..
تهاني / سلامات حبيبي مو على بعضك سلامات ..؟
غلا / ملل ..
تهاني / ودروسك ..؟ متى بتبدي تذاكري ..
تنرفزت غلا / اقووووووولها ملل تقولي دروسك ..
وقفت وراحت قدام المرايه تناظر جسمها / زاد وزني ..؟
تهاني ابتسمت / وربي ماأحد مجنون مثلك .. عليها اختبارات وزاره وهمها وزنها ..!! روحي ياماما ذاكري وربي ابرك لك .. وبعدين تعالي رجع زياد البيت ولا لسااا طالع ..؟
غلا ومو مهتمه بكلام اختها / لا رجع من الساعه 12ونص وينك فيه انتي .. بس بهالغرفه الي يشوفك يقول تذاكري ..
لفت تهاني وتكلمت مع من معها بالماسنجر بعدين قفلته .. وقامت اول ماجات تطلع لفت لأختها ..
/ اذا خلصتي طلعي وسكري الباب ..
راحت وغلا عصبت / ياسلااااااام جايه اشكي لها ولاتعطيني بال حتى ..
جلست على كرسي التسريحه وقامت تتحوس بأغراض اختها .. لفت انتباها دفتر مذكرات بالدرج الاخير ..
خذته وراحت تجلس على السرير .. ترددت تفتحه ..؟ ياااربي مايصلح اخاف تهاني تعصب .. بس ليه تعصب ..؟ مابيينا اسرار ..
فتحته وكان داخله ورد مجفف .. فتحت صفحه تلقائياً كان فيها خاطره بعنوان (( هل تحبـــني ..؟ ))
لا تسألني لماذا احببتك ..!!
ولا تسالني متى احببتك ..!!
ولا تسالني عن اسباب اشتياقي ..!!
لاني عندما رأيتك ..!!
تبعثرت جميع اوراقي ..!!
احس بك وانت بعيد ..!!
واراك امامي وفي منامي ..!!
اصبحت اراك في وجه البشر..!!
هل اشكر القدر ..!!
لانه عرفني عليك ..؟
وجعلني أذوب في عينيك ..!!
تلك العيون الجميله ..!!
التي رمتني في بحر لا اعرف قراره ..!!
لقد ارتسمت ملامحك في أحداقي ..!!
واختطت حروف اسمك في قلبي ..!!
فهل بعد كل هذا تسألني ..!!
هل تحبـــيني ..!!؟؟؟
فتحت على صفحه ثانيه بعنوان (( عفواً أنا عاشقــه )) ..
عفواً حبيبي أنا عاشقة
لكل معاني الحب في قلبك عاشقة
لكل كلمة لكل نظرة لكل همسة منك أنا لها عاشقة
حتى قطرات الندى في جمال قلبك عاشقة
فكيف لا أكون أنا لمن أعشق حتى الموت عاشقة
وتسأل في النهاية لما أنا لك عاشقة ..؟
أنا لك بكل المعاني مصارحة وبكل العبارات صادقة
نعم ..
نعم حبيبي ..
انا لك عاشــــــــــقه ..
قلبت عدة صفحاات لما شافت اسم بالأنجليزي مكتوب بخط كبيــر وباللون الأحمر ..
كشرت وهي تقراه .. بعدها نزلت تحت تقرا المكتوب تحته باللون الأزرق ..
شهقت غلا بصوت عالي ..
وسكرت الدفتر بسرعه لما سمعت صووت عند الباب ورجعته مكانه بسرعه وأرتباك ..
جات بتطلع .. الا فــتح احد الباب ..
نزلت راسها شافت ريهام واقفه مستغربه وتناظرها ..
غلا / خيير ..؟ تبين شيء ..؟
ريهام / لا بس زياد يقول نادي غلا ودورتك بغرفتك مالقيتك قلت يمكن بغرفة تهاني ..
غلا / طيب هذا انا نازله يلا روحي ..
راحت ريهام غرفتها وهي تناظر غلا بنظرات استغراب ..
وغلا ماعرفت سبب هالنظرات راحت تحت .. وشافت زياد يسولف مع تهاني ..
غلا / سلاام ..
زياد / وعليكم السلام .. وينك اذا نزلت تهاني تروحي فوق واذا راحت فوق تنزلي ..
تهاني تناظرها / ماتحبني ..
غلا ماهتمت لكلمة تهاني وكانت بحالة تفكير / زياد ابي توديني بكره عند بيان ..
زياد / ليه ..؟ البنت تذاكر وماتبي احد يزعجها ..
غلا / لا ضروري ابيها .. في اشياء ماأعرفها ابيها تحلهم لي ..
زياد / طيب وريني الي ماتعرفي واحلهم لك انا ولا تهاني ..
غلا / لا لا انا مااعرف مسائل رياضيات .. وانت وتهاني ادبي كيف بتحلونهم لي ..؟
زياد وقف / يعني مصممه تروحي ..؟
غلا رفعت راسها تناظره / ايه ..
زياد / خلاص اجل تجهزي بكره بعد المغرب .. والحين يلا تصبحون على خير تعبان وابي انام ..
غلا + تهاني / وانت من اهل الخيــر ..
بعد ماراح زياد .. ناظرت تهاني غلا / وش فيك غلا مو على بعضك ..؟
قامت غلا / مافيني شيء يالله برووح انام مع السلامه ..
تهاني ماتدري وش في هالبنت اليوم .. وين عادتها مزووحه وهبله .. فيها شيء البنت .. وكأن مكتشفه شيء خطيير ..
ممممم مو وقت هالتفكير افضل ارووح اريح واتحلم احلام حلوه .. (( ابتسمت ورددت بصوت مسموع وهي توقف )) احلام حلوه ..
\
يوم الجمعه الساعه 2 الظهر (( في بيت بو متعب )) /
كانت ساره جالسه بغرفتها تذاكر .. لما دق جوالها .. ناظرت الأسم على الشاشه (( روحي تحبك )) ابتسمت وردت ..
ساره / ياهلا ومرحبا بـ حبي الأول والأخيــر ..
اسيل / ايه انصبي علي واذا كلمتي بيان وغلا قلتي نفس الكلام ..
ساره / ههههههههه لا وربي بس بيان كاتمة اسراري .. وغلا مخططه لمقالبي .. وانتي حبي ..
اسيل / لا افضل اصير حبك ومخططه لمقالبك وكاتمة اسرارك ..
ساره ابتسمت / ابشري من عيوني .. بس قولي لي اخباارك وش مسويه مع الكتب الجميله ..؟
اسيل / وربي مافتحتها مالي خلقها ولا خلق جمالها وبعدين لاتجيبي طاريها انا متصله علشان اعزمك اليوم في بيتنا انتي والبنات ..
ساره مستغربه / من صدقك ..؟ وقت أختبارات ..!!
اسيل / ايه من صدقي مدام غلا وبيان بيغيبوا لمدة اسبوعين وحنا اختباراتنا يوم الأثنين تبدا .. خلونا نغير جو علشان نقدر نركز بعدها ..
ساره / مممم ماأدري يالهبله قلتي للبنات ..؟
اسيل / ايوا قلت لهم كلهم ووافقوا بس باقي انتي .. وبيان ضي بتقـنعها ..!!
ساره / يعني ماوافقت ..؟
اسيل / لا مو على ماوافقت بس نحسها متردده .. وبعدين فكونا يانوابغ وبلا عباطه ..
ساره / هههههههههههه حلوه عباطه .. خلااص ولايهمك بعد العشااء تشوفيني عندك ..
اسيل / اوكيك يالله مااعطلك برووح اتكشخ ..
ساره بأستغراب / من الحين ..؟
اسيل / ايه من الحين يلا طسي ..
ساره / ههههههههههه ماتعقلين مهما مر الزمن ..
اسيل / تكفييين يالعاقل .. يالله باي باي لو اتهاوش معك ماسكرت الا بعد ماتخلص الاختبارات ..
ساره / هههههههه الله معك ..
\
في بيت (( بو حمد )) الساعه 5 المغرب /
بيان كانت تصاارخ بالصاله / ضـــــــــــــي ضــــــــــــي ووجع يوجع العدو ان شاء الله .. ضـــــــــي ..
طلت ضي من الدرج معصبه / وش فيك بسم الله تصارخي ..؟ فيه حرامي ..؟
بيان حطت يديها على خصرها / لا والله اسم الله علي .. اصاارخ لأن ماأحد بالبيت وين راحوا ..؟
ضي / يعني ماتعرفي تجي فوق وتضربي باب غرفتي .. وتسأليني وينهم ..؟ لازم صرااخ ..
بيان / مالي خلق وبعدين تفاجئت وين يروحون واليوم الجمعه من يطلع اليوم ..
ضي / احلفي بعد الطلعه فيها يوم .. راحوا اساسا لجارتنا ام سعد .. صاير لـ زوجها حادث والحمدلله ماجاه الا شوية رضوض بالساق وحمد وابوي ومشاري راحوا يتحمدون له بالسلامه .. وراحت امي لزوجته بعد تتحمد لها بسلامة زوجها ..
بيان / اها ياعمري ... طيب مالبستي انتي يبي لك ساعات على ماتخلصي ..؟
ضي رفعت حواجبها / من الي يبي له ساعات انا ولا انتي ..؟ المهم تعالي ابي اوريك شيء بالابتوب ..
راحت بيان لــ ضي فوق في غرفتها ..
جلست ضي على الكرسي وانحنت بيان عليها علشان تشوف ..
ضي وهي تأشر على صورة تسريحه / ناظري وش رايك اقص شعري كذا ..
بيان / ممممم بس شعرك مو طويل مره يعني لحد كتفك وتقصينه زياده ..؟
ضي / ايه عادي ياقلبي تعرفيني ماأحب الشعر الطويل ..
بيان خزتها / يعني شعري مو حلو ..
ضي / هههههههههه لا انتي شعرك اسود وناعم وكثير ماشاء الله يعني حلو الطويل عليه انا خفيف وبني ..
بيان / بس ناعم ..
ضي / ايه حتى لو .. خفيف مايصلح له الطويل .. ايه صح ماقلتي لي غلا مو اتصلت امس الفجر وقالت بتجيك ..؟
بيان / ايوه بس اليوم لما عزمتنا اسيل خلااص كلمتني قالت اشوفك عندها ..
ضي / بس هي تبي تسألك عن الرياضيات اتوقع ..
بيان / ايه عادي تسألني بالتلفون بعدين ولاتجيني بكره ..
ضي / اها ..
لفت تناظر الصور والقصات ..
بيان / ممممم ضي ..!!
ضي وهي تناظر الصور / هلا قلبي ..
بيان / مممم تصدقي ضي .. امس وانا افكر عرفت اني ابي اتزوج واحد على قد حاله .. ماعنده فلوس كثير واهله ناس عاديين جداً
ضي لفت بقوه وهي مفتحه عيونها بأستغراب / من جدك ..؟ انتي عكس البنات هههههههه الناس يبون تاجر يدلعهم وانتي تبين فقير ..؟ وبعدين وش جاب هالشيء على بالك امس ..
بيان نزلت راسها / مو يعني فقيــــــر ماعنده فلوس .. لا يعني مدرس واهله عاديين .. مثلاً ابوه مدرس بعد ومعيشهم على الراتب هذا .. والي جابه على بالي صراحه يوم فكرت بـ لينا ..
ضي نزلت عيونها تناظر يدين بيان الي شابكتهم بقوه / لينا الحمدلله تلبس احلى اللبس وتاكل احلى الأكل .. مو معنى ان ابوها فراش صارت فقيره .. هذا شغله محترمه مافيها اي عيب .. وبعدين وش دخل لينا انك تتزوجي واحد على قد حاله ..
بيان جلست على سرير ضي وتكلمت بحماس / انا ماقلت انها فقيره بس يعني احسها لو اشترت شيء جديد او جاو بيسافروا او يسوو اهلها اي شيء انها تفرح من كل قلبها مو مثلنا متعودين على كل شيء جديد ومتعودين على السفر والأشياء الغاليه .. وودي اني اجرب الحياه العاديه مو اطلب اي شيء ويجيني .. ودي افكر كيف اصرف فلوسي واسوي ميزانيه (( ابتسمت )) زي الهنود هههههه .. مو معناته اني ماأحب اعــيش بخير .. بس الحمدلله اهلي ماقصروا ابي اعيش باقي عمري اعرف معنى الفلوس وافرح لو صرت مدرسه او اي شيء واستلمت راتبي ..
ضي بأبتسامه / يعني انتي عشتي بخير ماتبين عيالك يعيشون بخير ..؟
بيان فتحت عيونها وحركت يدينها بمعنا لا / لا لا من قال كذا انا ماقلت فقرااء .. قلت لك مدرس وانا مدرسه بعد يعني ماراح يحتاجوا شيء ..
ضي / طيب نفس الشيء اغنياء ..
بيان ابتسمت / لا في فرق بين الي عايشين على قد حالهم .. وبين الأغنياء .. الأغنياء اي شيء يخطر على بالهم يجيبوه بنفس الوقت ..
وقفت ضي / وربي انك غريبه يابيان غرييييييييبه من قلب ..
بيان وقفت مع اختها ومسكت ذراعها / مو قصدي اني اصير غريبه بس لأن كل عمامي تجاار ماأحس بأحد عارف قيمة الفلوس .. شركات ووظائف مرموقه ومحلات ..
ضي / عمامي اوكي انتي صادقه بس خالي صالح عادي لاعنده لا شركات ولا محلات ولاوظيفه مره مرموقه عادي مدرس .. خذي اجل زياد (( ناظرت اختها وحركت حواجبها ))
بيان ضربتها على خفيف / ههههههههه تفكيرك غلط .. تبيني اخذ واحد مزاجي وعصبي ماني ناقصه .. وبعدين لسا صغيره ..
ضي / عليييييييييييييييينا
بيان / مالت برووح البس احسن لي ..
مشت وفتحت الباب واول ماطلعت ..
ضي / البسي ولاتفكري كثير بالأفلام الهنديه والفقراء والتجار هههههههههه
مدت بيان لسانها لأختها وهي تضحك وسكرت الباب بالقوه ..
ضي / ههههههههههه وربي اختي تحفه عليها سوالف انمااااااااا ايه ههههههه
ودخلت تتروش ..
\
في بيت (( بو وليد )) الساعه 9 بالليل //
كان كل البنات جاوا .. ومتجمعين بمجلس الحريــم ..
بيان / اسيلوووه وين الشوكليت المفضل عندي ..؟
اسيل / اي شوكليت هذا كل انواع الشوكلاته ..
شيماء / ههههههههه لا ياقلبي النوع المفضل عند بيونه الشوكلا السويسريه الي لونـه من برى اصفر .. وطعمه عسل حتى يسمونه ابو جبل ..
عبير / ههههههههههههههههههههههه عليها وصف وربي تـــحفه ..
شيماء / عبيروه دوري غيري علقي على كلامه ..
بيان / ههههههههه حلوه ابو جبل (( قامت تهز راسها مثل الهنود )) ابو جبل .. ابو جبل ..
شيماء عصبت / بيانوه عبيروه انطموا لااصككم بالصينيه ..!!
بيان وعبير يناظرون بعض ببرائه ومع بعض قالوا / حنــــــــــــــــا ..
ساره / لا جدكم .. كفك شيماء ..
ضربت كفها ..
شيماء / وربي ذولا لو يرتكبون جريمة قتل ويمسكونهم الشرطه ويسوون هالحركه يتركونهم الشرطه من نظرات البرائه الي بعيونهم ..
الكل / ههههههههههههه
غلا / لا ومشكله لو حطوا اصابعهم في فمهم .. تقولين بزارين مايعرفون شيء بهالدنيا ياعمري ..
ضي / حتى ساره تسويها ترى هههههههههههه
ساره / لا مااسويها مثلهم .. حاولت بس مااحد يقولي بريئه .. كلهم يقوولا ماينااسب ..
بيان / صادقين ههههههه
كانت تهاني سرحانه بعالم ثاني وفجأه وقفت / اسيــل حبيبتي في احد بالصاله ابي دورة المياه ..؟
اسيل تهز كتوفها / ماأدري .. بس حتى لو مايبين الا اذا وقفتي عند المدخل الصغير الي مقابل الغرفه هذه ..
تهاني / اها اوكي حبيبتي ..
مشت تهاني بتطلع وكملوا البنات السوالف .. لكن غلا كانت مركزه على تهاني لحد ماطلعت وبعدها مسكت شنطتها وطلعت جوالها ماتبي تستمع لسوالف البنات تبي تسوي نفسها مركزه على الجوال .. مو قادره تنسى الي قرت امس .. مو قادره .. لازم اكلم بيان بأقرب وقت لازم ..
تهاني اول ماطلعت وقفت عند المرايه الي مقابل دورة المياه وجلست تعدل شكلها .. وبعدها دخلت دورة المياه ..
\
دخل خالد من باب الصاله ولا شاف احد فيها سكر الباب وراه .. وراح على طول للمطبخ يشرب مويه ..
آآه ياقلبي على هالشغل ماادري من ضربني على يدي وقالي ادخل طب ..!!
شرب مويه .. وبعدها مسك جواله يدق على حمد ..
حمد / ياهلااااا ماأسرع اشتقت لي ..
خالد ابتسم / لا وربي ماأشتقت لك ياحبيبتي لأنك دوم محفوره في فكري ..
حمد / هههههههههه ياشيخ توني ادري ..
خالد / المهم حمد ماطلعت من المستشفى ..؟
حمد / لا لساا باقي عندي مريــض بالعياده .. اخلصه وطالع ..
خالد / طيب اسمع اذا خلصته مر على عيادتي وخذ منها ملف أحمر انا حاطه على المكتب وجيبه لي بالبيت لو ماعليك تعب .. لأني ما أطلعت عليه وبكره لازم اسوي الأجرائات الي فيه ..
حمد / ابشــر ياطويل العمر ..
خالد مبتسم / اوكي سلاام ياولد عمي ..
حمد / مع السلامه ..
طلع من المطبخ بعد مادخل جواله بجيبه ..
ياربي وين اهلي ..؟؟ توه بيروح فوق الا سمع اصوات بمجلس الحريم .. ابتسم ابتسامته الحلوه الي ماتفاارق وجه ..
ياحليل اهلي اليوم مغيرين ورايحين مجلس الحريم ..؟ مو عوايدهم ..
مشى وكان باب الموزع الي يفتح على مجلس الحريم وغرفة طعام الحريم مفتوح ..
توه بيدخل الا شاف بنت طالعه من دورة المياه وتناظر نفسها بالمرايه على جنب ..
وقـــف مو مستوعــب ..
معقـــوله ..!! معقـــوله ..!!
معقوله من كثر ماأفكـــر فيها صرت أشوفها بكل مكان ..!!
ههههههه ياحليلك ياخالد شكل جاتك هلوسه .. او أثر حبها على عقلك ..
التفتت تهاني تبي تلف على المجلس الي فيه البنات ووقفت مصدومه يوم شافت قدامها خالد ..
نطقت لاشعوريا بصوت شبه مسموع / خالـــــــــد ..؟؟
خالد مو حاس بنفسه قالت اسمه ..!! يعني مو وهم ..
توه بيتكلم بس هي بلمح البصر وصلت عند باب المجلس وتوها بتفتحه ..
خالد بهمس / لحــــــــظه ..
تهاني كانت يدها تنتفض وهي حاطتها على مقبض الباب ..
خالد / تــهاني .. تهاني طالعيني ..
تهاني مالفت .. ياربي وش يبي هالمجنون شكله ناسي اني مو حلال عليه ..!!
خالد / تهاني .. تهاني علشاني طالعيني مشتااق لك ..
تهاني من غير ماترد عليه فتحت الباب وهو رجع علشان ماأحد يشوفه ..
دخلت على البنات وهي مرتبكه ويدينها تنتفض .. الكل ناظرها وشاف وجهها المحمر ..
غلا اول وحده تكلمت بشك / وش فيك تهاني مختبصه ..؟
تهاني تحاول تبتسم بس ماقدرت / ههههه مافيني شيء بس طحت وحسيت نفسي أضحك لو ان جنبي احد فشــله ..
شيماء / سلاااااماااااات ياقلبي ..
بيان وقفت وراحت لها وحطت يدها على ذراعها / تعورتي ..؟
ضي وقفت جنب اختها / وخري يدك لاتدلعيها شوفيها مافيها الا العافيه
ناظرتها ضي بنظرات .. فهمتها تهاني ..
ساره / تعالوا اجلسي تهاني نعلمك بساالفة عبير وياالبلوتوث خخخخخ كاتبه اخت المعرس ..
ضربتها عبير بالقوه / وجع سارووه ورى ماتنشريها بالنت ..
اسيل / ههههههههههه تسويها ..
قامت اسيل وناظرت تهاني وهي تجلس جنب البنات / وربي شكلك تقولين بيتهم نحس كل مره اجي اطيح ..
كل البنات ماعدا غلا وتهاني / ههههههههههههههههه
اسيل تناظر البنات وهي تضحك / من جد ذاك المره طاحت جنب سياارة خالد لأنها منزله راسها يقالها مستحيه من خالد ولانتبهت للشجره المايله وشبك راسها فيها هههههههه وطاحت ياقلبي عليها ..
البنات / هههههههههههههههههه جد ..؟
تهاني ووجها نااار تقلدهم / جـــــــد ..؟ انطموا كلكم لاأصيح ..
بيان / هههههههههههه لا ياقلبي تعالي تعالي جلسي نكمل سوالف ..
الكل كان يضحك ماعدا تهاني الي كل ماتذكرت خالد حمر وجهها .. وضي الي بين الفتره والثانيه تلتفت لها .. اما غلا كانت بحاله غريبه .. حالة شــك ..!! نظراات ترميها على تهاني الي مو منتبه للي يصير بغلا ..
بعد العشااء الكل اتصل على اخوه يجي ياخذه ..
وشيماء وغلا وتهاني كانوا كل ماأتصلوا بأهلهم ماأحد يرد ..
غلا وهي ترمي الجوال على الكنب بعصبيه / اوووووووف يعني وقت يسكر ثامر جواله مايكفي زياد مايرد ..؟
بيان / طيب والسواق ..؟
غلا فتحت عيونها / مجنونه بيان ..؟ من متى عايلتنا الحلوه ترضى نركب مع السواويق هالوقت ..؟
ضي / ماعليه اختي تأثرت من الدراسه ههههههه ..
بيان كشرت / مو قصدي .. بس لأنهم ماردوا عليهم .. طيب تعالوا نوصلكم ..
ساره / لا انا بوصلهم فيــصل جاء دق الحين ..
شيماء / ياااااااااااااااربي رد علي .. رد يامحمد الله يخليك ..
بيان / ههههههههههه ياعمري شيماء اجل انتي الي بنوصلك ..
ضي / خلااص علي الطلاق ان نوصلك ياشيماء ولاتزعجي اخوك مسكين نايم شكله ..
شيماء عصبت / يعني قايله له لاتنام بس مافيه فايده ..
عبير فااضيه / يووه حساافه ماعندي احد اوصله ..
البنات / فااااااااااااضيه ههههههههههههه
ساره تناظر جوالها وهي تلبس شيلتها / يلا يلا تهاني وغلا فيصل شكله عصب من زمان برى ..
لبسوا البنات عباياتهم وطلعوا مع ساره ..
قبل ماتركب ساره السياره ناظرت البيت من برى (( وين وليد نور البيت ..؟ اللـــــه لو انه موجود كان فرحتي اكبــر ))
ركبت ساره قدام وسلمت ..
وبعدها ركبوا غلا وتهاني ورا ..
غلا + تهاني بصوت خافت / السلام عليكم
فيصل / وعليكم السلاااااام ياهلا ببنات خالي ..
نزلوا غلا وتهاني راسهم ياجرأة ولد عمتهم ..
ساره تضربه على كتفه بخفيف وهي تبتسم / ترى يستحون لاتنسى ..
حرك السياره وهو مبتسم / لا ماارح انسى بس مشتااق لسوالفهم وبالذات رجة غلا ماأنسى مقالبها لي وهي صغيره ..
ساره وتهاني / هههههههههه
غلا كان وجهها محمر ..
اما تهاني نزلت راسها يوم حست بنظرات فيصل لها من المرايه ..
ياااربي وش ذا الموقف الي حطيتي نفسك فيه ياتهاني ..!!
ساره / الا وش سويتوا بدبي استانستوا ..؟ ومتى رجعت يوم اروح بعد العشااء لبيت عمي لساا مارجعت ..
فيصل / بالنسبه للوناسه تونسنا بس ذبحنا فهد الله يهديه وذبح سطام معه .. كل ماجينا بنريح قومنا مابقى مكان ماودانا فيه .... حتى مارجعنا الا الساعه 10 بعد مارحتي ..
ساره / اهااا ماشاء الله ..
فيصل / اقول تهاني اخباارك مع الأنجليزي ..
ساره / مسكينه هي وضي حالتهم حاله معاه ..
فيصل خزها يعني انا ابي اكلمها لاتتكلمي .. وساره فهمته بس طنشته لأنها عارفه مشاعر تهاني تجاهه .. مشاعر اخويه لاغير ..
وماودها اخوها يتعلق فيها كثير ..
فيصل / الله يعينهم ياارب ..
غلا في نفسها (( انا ثالث ثانوي ماسألني والأخت تهاني سألها )) ناظرت غلا تهاني على جنب .. (( يااربي متى اكلم بيان وافضفض لها في الي داخلي متى ..؟ ))
وصلوا بيت بو ثامر والكل ساكت ..
نزلت غلا اول وتو تهاني بتنزل الا التفت فيصل وقال / سلمي لي على خالي ياتهاني وعلى مرت خالي وعلى زياد وحبي لي رهوومه
ضربته ساره بكوعها يعني اخلص ..
ساره / هههههههه قول العايله الكريمه كلها ..
فيصل طنشها / واهتمي بنفسك والله الله بالأختبارات ..
تهاني بخجل / ان شاء الله .. مع السلامه ساره ..
نزلت من غير ماتقوله مع السلامه .. يااااربي .. وش اسوي فيه .. اخاف يحسبني احبه .. لا لا يعرف اني احبــ ....
اوووووف ليه افكر اول ادخل لاأطيح بعد وتتحقق الكذبه ..
دخلت تهاني وعلى طول لغرفتها ماحست بغلا الي كانت جالسه بالصاله ومبين انها معصبه ..
ناظرت غلا تهاني وهي تروح فوق ..
آآآه ياربي شسالفتك ياغلا .. تغيري من اختك ..؟ بس ليه ليه ..؟ وش معنى فيصل ..؟ وش معنى ..؟
اعوذ بالله من الشيطان اقوم انام واكلم بيان بكره افضل .. لا وش بكره اليوم .. لا اخاف تعبانه .. اوووف اهدي ياغلا اهدي ..
راحت غرفتها بسرعه وهي في بالها الف سؤال وسؤال ..
\
في سياارة حمد ..
كانت شيماء من ركبت السياره وهي ساااااكته .. ومنزله راسها من الحياء ..
بيان الي كانت جبنها / حمد وش فيك نزلت اول ماجيت لنا ..؟
حمد يبتسم / ياحبك للفضول يابيون .. كنت اعطي خالد ملف يبيه .. ارتحتي هههههههه
بيان حطت رجل على رجل بدلع / ايه ارتحت .. بس قدم السيت حق ضي ضيــق ..
ضي التفت وناظرتها حاطه رجل على رجل وخزتها من البرقع حقها / اقول اها بس صيري عاقل مثل شيماء ونزلي رجولك ..
بيان تسبل برموشها / صدقيني شيماء لو انها مو مستحيه من حماده كان شفتي الهباال بس الحيااا (( التفت لشيماء وبصوت عالي )) مقـــــــــطعها ..
شيماء حمر وجهها من الفشيله .. وودها تقتل بيان ..
ضي / هههههههههههه الله يفشلك فشلتي البنت ..
حمد / وحماده بعد تقول حسابك بالبيت ..
بيان رجعت تسبل بعيونها / ليه وش سويت ..؟
حمد / اول شيء فشلتيني مع هالدلع .. ثاني شيء فشلتي شيــمـ .. (( وقبل ماينطق كل اسمها حس بنفسه )) .. فشلتي صديقتك ..
بيان / هههههههههههه لا عادي شيماء مايهمها ..
شيماء وقتها قررت تسوي جريمة قتل .. طيب يابيان .. طيب ..!! موتك على يديني ..
وصلوا شيماء بيتها وقبل ماتنزل قالت بصوت واطي / مشكورين ..
بيان وضي / قمنا بالواجب ..
حمد بصوت واطي / ههههههه متدربين على الكلمه يالخوات ..
خزت شيماء بيان بغيض وسكرت الباب ودخلت البيت ..
ابتسمت بيان بعد مامشت السياره .. مممم ليش هالأحساس ..
احساس غريب .. يقولي ان هالعطله غــير عن كل العطلات .. ليه احس شيماء بتصير قريبه مني اكثر .. وليه احس اني بفقد شيء بحياتي .. ليه احس ان حياتنا كلنا بتتغير .. ليه وليه وليه غمضت عيونها .. يااربِ وش ذا التفكير ..؟ يارب وفقني بالأختباارت وعدها على خير .. الظاهر تأثير اختبارات ثالث ثانوي .. رجعت فتحت عيونها وقرت بصووت غير مسموع (( اللهم اشرح لي صدري ويسر لي امري )) .. لاألـه إلا الله .. حست براحه نفسيه .. ماودها تفكر كثير والأختبارات على الأبواب ..